हसरी पहाट

उठा उठा हो सकलजन 

उगवलीय हसरी पहाट 

गावकुसाबाहेर कुईकुई

वाजतो आडाचा रहाट

शाल धुक्याची पांघरून

पहाट‌ झालीय मोकळी

दवबिंदुंच्या या शिंपणाने

उमलताच हसली कळी

फेकू निशेची काळी दुलई

संपते बिछान्यात वळवळ

सडा प्राजक्ताचा अंगणात

सुटलाय मंदधुंदसा दरवळ

चमकुनी शुक्राची चांदणी 

जाता खट्याळ हसे गाली

रवीराजाच्या आगमनानेच

पसरली नभी सुवर्ण लाली 

राऊळातला गोड घंटानाद 

प्रभाती मंजुळ काकडारती 

भास्कर डौलाने येता नभी

पक्षीगणही मुक्त विहरती 

पाखरांची किलबिल शीळ 

कानावर पडे मंजूळ गाणी 

करी चिमणचाऱ्याची घाई 

ऐकूया भूपाळीचीच वाणी