Library
Profile
हरवलेले शब्द
हरवलेले शब्द
शब्द असे लबाड असतात
नाचत नाचत पुढे येतात
हातात हात घालून येतात
भोवती पिंगा घालीत राहतात
शब्द असे लबाड असतात
पदर घट्ट धरून ठेवतात
कडे घेण्या हट्ट करतात
हळूच मनाचा ताबा घेतात
तळकोपरे धुंडत राहतात
शब्द असे खट्याळ असतात
मनामधून उतरून खाली
कागदावरती जाऊन बसतात
कवितेच्या प्रांतात मग
घरच्यासारखे वावरू लागतात
शब्द असे लडिवाळ असतात
आपण असावे कधी गुंग
कामामध्ये अगदी दंग
तेव्हाच नेमके घ
ेऊन रंग
समाधि आपली करतात भंग
मनात शिरून बसण्यासाठी
प्रयत्न आटोकाट करतात
शब्द असे हट्टी असतात
मन जेव्हा असते व्यस्त
विचारांनी असते त्रस्त
व्यग्र व्यस्त मनाची मग
कवाडे ना त्यांना उघडत
शब्द बसतात तेव्हा रूसून
कोप-यामध्ये जातात दडून
पुन्हा शोधू म्हणता मात्र
येत नाहीत पुन्हा जुळून
अशा हटवादी शब्दांनी
मनात मग माजते काहूर
अन् मागे मात्र उरते
फक्त एक हुरहूर
फक्त एक हुरहूर
