हरवलेले बालपण...

शोधू कुठे हे कळेना 

बालपण सरलेले 

इच्छा माझी नसताना 

वय माझे वाढलेले

किती जरी ठरवले

बालपण जगायचे

रिमझिम पावसात

चिंब चिंब भिजायचे

कागदाची छोटी होडी

पाण्यामध्ये सोडायची

हळूहळू चालताना

कौतुकाने पाहायची

कैरी जी आंबटगोड 

हलकेच तोडायची 

छोट्या छोट्या मित्रांमध्ये 

मजा वाटून खायची

लपाछपी दोरीउडी

धप्पाकुट्टी नि लगोरी 

बालपणी सारे खेळ

कित्ती कित्ती होते भारी 

धिंगामस्ती केली तर

रागावत बाबा आई

भोंगा तो पसरतात 

कुशीमध्ये तीच घेई

क्षण ते हरवलेले 

बालपण आठवणी

आठवू या पुन्हा पुन्हा 

आठवणीतील गाणी