हळवी सांज
हळवी सांज
1 min
553
खेळ खेळताना डाव येईल माझ्यावर
ह्या प्रतिक्षेत कोवळे हरवले माझे स्वर
गुंतविता मिठीत साठविले लाघवी क्षण
कधी प्रपंचात विसावले ते भान हरपून
आता कुठे जराशी जाग मला आली
पहाता सभोवार आयुष्याची सांज ही झाली
ह्या पल्याडही आहे जिणे पडला विसर मनास
झाकलेल्या मुठी रित्याच हाच जीवनाचा प्रवास
देहानेही अनुभवली किती रूपे विविध
आसवांना पापण्यांनी केले काहिसे कैद
अंधारा आधीचे रंगीत झालेले आकाश
माझा रंग शोधण्या जरा झालाच अवकाश
खिळून गेली आज नजर क्षितिजावर
साद घातल्याचा पल्याड सूर येतो कानावर