हद्द
हद्द
पाणी जगवते पाणी मारते
तोंडचे पळवते पाणी
महाराष्ट्रातील महापूराने
हेच सांगितले कानी
सिमेंट काँक्रिटची जंगलं उभारत
माणूस सुसाट सुटला
अविचारी होऊन अखेर
स्वतःच्याच जीवावर उठला
नदीनाल्यांवर अतिक्रमणाची
स्पर्धा नेहमीच नडते
प्रवाहातील हस्तक्षेपाने
मोठे विपरीत घडते
अजूनही राखली पाहिजेत
नद्यांची प्रशस्त पात्र
नाहीतर भविष्यात वै-याचीच
असेल प्रत्येक रात्र
पाणी देतेच दाखवून
त्याची हद्द अन ताकत
निसर्ग कधी कोणापुढे
मुळीच नसतो वाकत!
धोक्याची घंटा वाजते आहे
झोपेचे सोंग बरे नाही
नद्या धोक्यात आणल्या तर
माणसांचे काही खरे नाही