गर्भकळी
गर्भकळी
कुजबूज कुजबूज गर्भामध्ये
नित तिची चालली होती
सुंदर फूल होण्यासाठी
एक गर्भकळी आसुसली होती
गर्भनिवाऱ्यात अनेक स्वप्ने
डोळे मिटूनी पाहत होती
तिच्या भावंडास भेटण्या
एक गर्भकळी आसुसली होती
आईच्या गोड शब्दांना
हुंकार आतून देत होती
स्पर्श आईचा होण्यासाठी
एक गर्भकळी आसुसली होती
सुंदर जग मलाही पहायचंय
यासाठी ती धडपडत होती
सुंदर जगी या जन्म घेण्या
एक गर्भकळी आसुसली होती
शब्द अचानक कानी पडले
ऐकून आज ती थरथरत होती
मुलगी आहे गर्भात म्हणुनी
आई तिची रडत होती
जीवास धोका जाणुनी आपल्या
गर्भकळी भेदरली होती
काय करावे? कुठे लपावे?
जागा सर्वत्र शोधत होती
मार्ग दिसेना कोठे तिजला
हिरमुसून ती बसली होती
स्वप्ने सारी जळून गेली
रूदन आतुनी करत होती
हात काळाचे येता जवळी
प्रचंड आकांत करत होती
काय चूक रे माझी देवा?
प्रश्न विधात्यास करत होती
श्वास संपला बघता बघता
निपचित आत ती पडली होती
फूल होऊनी सुगंध देण्यास
एक गर्भकळी आसुसली होती
एक गर्भकळी आसुसली होती