घरटे चिमणीचे ....!

  नित्यनेमाने एक चिमणी 

      माझ्या घराच्या दर्शनी दरवाज्यावर 

      येऊन बसते माहेरवाशीण सारखी ....

      ती मनसोक्त चोच घासते दरवाज्यावर , 

      टकटक आवाज करते , अन  

      अंगही घासते दरवाज्यावर .... 

      चिमणीचा हा नित्यक्रम 

      मी रोज न्याहाळतो ,

      अन वाटते ....

      का बरे ती येत असेल रोजच

      या दरवाज्यावर ....? 

      मनात तर विचारांचं काहूर उठते ... ! 

      माझ्या घराला सजविणारे 

      दरवाज्याचे लाकूड   

      तिचे घरटे असलेल्या 

      झाडाचे तर नसेल ....?

      अशावेळी चिमणीचं होऊन जाते झाड 

      माझ्या मनाचं ....!!!!