गावरान सुशिक्षितांनो
गावरान सुशिक्षितांनो
महालात राहणाऱ्या गावरान सुशिक्षितांनो
झोपडीतपण माणसंच राहतात
हाडामासाचे
तुमच्याचसारखी
त्यांनाही आहेत भावना
जी असते प्रत्येक जिवंत मेंदूत
वाटतं त्यांनाही महालात रहावं
भारी वस्त्र अंगात घालावी
तुमच्याचसारखे मुलायम भरजरी
वाटतं सदऱ्यावर नेकटाय लावून
सुटाबुटातला साहेब व्हावं
ऑफिसमध्ये बसावं
फिरणाऱ्या खुर्चीतल्या माणसागत
तुमच्याचसारख हुबेहुब
पण तुम्ही श्रीमंतांनीच तोडलेत गरीब, वनवासींचे पंखं
भ्रष्टाचार अन् हातातल्या कलमेच्या बंदुकीनं
केलात त्यांच्या स्वप्नांचा चुराडा
बांधलेत महाल अन् मॉल
तुमच्या श्रीमंतीच दर्शन घडविणारे
शापित विटांच्या भिंतीचे
जे भूकंपाच्या पहिल्या झटक्यात कोलमडेल
क्षणात संपेल तुमचा डोंबाऱ्याचा स्वार्थी खेळ
अन् उठतील आर्त किंकाळ्या
इतरांना सतर्कतेचा इशारा देणाऱ्या
तुमच्याच बेशुद्ध डोळ्यासमोर
मात्र तुमचा प्राण पाखरू झाला असेल
अन् शरीर थंड