एकदा काय झाले

एकदा काय झाले पाहा

लांडोरीने उघडले पार्लर

मोठा बोर्ड लावला बाहेर

केली ताठच तिने कॉलर

पहिले गिऱ्हाईक कावळा

बोलले मला व्हायचे गोरे

घ्या किती तुम्ही पैसे फीचे

पण काळ्याचे करा पांढरे

लांडोरीने चोपडला शाम्पू

लावले बरेच फेशियल क्रीम

काळा रंग बदललाच नाही

आणे दुकानचा साबण वीम

घास घास त्याला घासून

पंख केले तिने भरपूर ओले

कावळ्याला भरली हुडहुडी

कापरे भरले आणि तो बोले

माफ कर बाई लांडोरीताई

नाहक भूललो व्हाया गोरे

देवाजीनेच बनवले काळे

तेच वाटतेय आम्हांस प्यारे