एक वादळ शोधतोय मी

एक वादळ शोधतोय मी 

प्रचंड क्षमतेचं 

मनात कापरं आणणारं 

सनातनी विषारी वृक्षांना 

मुळासकट उपटून टाकणारं 

एक वादळ तू निर्माण केलं होतंस 

शोषित समाजाच्या मनाच्या गाभाऱ्यात 

एक गती तू निर्माण केली होतीस 

आमच्या मनात उठणाऱ्या 

बंडखोरीच्या वाऱ्यात 

याच वादळाने उधळून दिले 

मनोरे सडक्या मनुवादाचे 

सैतानालाही लाजवणाऱ्या 

विषारी जातीयवादाचे 

पण आज गतीच मंदावलीय त्या वादळाची 

राहिली ती फक्त झुळूक 

संथ, सुस्तावलेल्या मनात 

कारण आमच्या पिढीच्या हातात 

करवंटी कधी आलीच नाही 

म्हणून आम्हाला त्या मनुवादाच्या चक्कीत 

भरडल्या जाणाऱ्या 

अस्पृश्यांच्या मनात उठणाऱ्या 

वादळाची जाणीव कधी झालीच नाही 

आयतं गुलामगिरीमुक्त जीवन मिळणाऱ्या 

मिजासखोरांना 

तुझ्या विचारांचं वादळ 

कळणार कसं 

गळ्यात अडकवलेलं 

गुलामगिरीचं मडकं 

गळणार कसं 

या विचारानं 

मनात एक प्रश्नचिन्ह निर्माण होतंय 

म्हणूनच एक वादळ शोधतोय मी 

प्रचंड क्षमतेचं 

मनात कापरं आणणारं 

सनातनी विषारी वृक्षांना 

मुळासकट उपटून टाकणारं