एक कप चहा!!

बिनचुक भेट होते ज्याची रोज सकाळी

गरमागरम, वाफाळता आणि किणकिणता

आवाज असतो एक कप चहा ||१||

आधुनिकतेच्या पडद्याआड लपत चाललेला

आपलेपणाचा तो एक कप चहा ||२||

पुर्वी गावात पैसा कमी पण, मनाची होती श्रिमंती.

जिव्हाळ्याचे नाते जपणारा दुवा बनायचा

 तो एक कप चहा ||३||

उन्हे कलली की, ज्येष्ठांना चहाची आठवण येई,

किती वाजले पोरांनो प्रश्न विचारले जाई.

घाईगडबड, तारांबळ,सुनांची धावपळ उडवणारा

एक कप चहा ||४||

चहा साखरे साठी मग पोरांना दुकानात पिटाळले जाई

अंगणातील शेळी,बकऱ्यांचे दुध धुतले जाई.

दांडी नसलेला कप,बशी नाही म्हणून घेतलेली ताटली,वाटी,फुलपात्र सारा लवाजमा एकत्र करणारा एक कप चहा ||५||

फुरक्या मारत, आनंद घेत पिला जाणारा

कधी थंडा तर कधी गरम एक कप चहा ||६||

पाहुणा येता एका घरी, चहासाठी आमंत्रण असायचे त्याला घरोघरी

नको, नको म्हणता-म्हणता आपुलकीने

पाजला जायचा तो आग्रहाचा एक कप चहा ||७||

असायचा तो चुलीवरचा,धुरकटलेला,कमी दुधाचा, बिगर दुधाचा,काळा आणि गुळाचा पण मायेच्या गोडव्याने ओतप्रोत भरलेला असायचा

तो एक कप चहा ||८||

सुटाबुटातील पाहुण्याने आपल्या घरचा

एक कप जरी घेतला तरी

 गावाकडील माणसाच्या चेहऱ्यावर समाधान आणणारा असायचा तो एक कप चहा ||९||

आज आहे सर्वांकडे ग्रीन टी,लेमन टी

डीप करून पिण्याचा छोटा पॅकेट वाला चहा

पण सर नाही त्याला, माणुसकी जपणारा असायचा

तो एक कप चहा ||१०||

चहा पीत असतांना कुणी अचानक आलेच

तर त्यालाही अर्धा कप देता येईल

या विचाराने बशीत ओतून पिला जाणारा

तो एक कप चहा ||११||