दिवाळीच्या स्वागताला

दूर झाली काळी रात्र,

झाली सुरम्य सकाळ....

दोन वर्षांच्या कालाने,

दूर जाहला दुष्काळ....||१||

रांगोळीचे रंग सारे,

भरू एकत्र होवुनीं....

सारे अंगण सारुया,

उंच कंदील लावूनी .....||२||

प्रेम देवू निःस्वार्थाने,

राग, लोभ दूर करू.....

घेऊ काळजी साऱ्यांची,

मदतीचा ओघ धरू.....||३||

वसू बारस दिनाला,

पूजा गाय वासराची...

घेवू आशीर्वाद सारे,

सौख्य वाढेल साऱ्यांची....||४||

धन त्रयोदशी येता,

दिप अंगणी लाऊया....

नरकचतुर्दशीला

स्नान अभ्यंग करुया....||५||

करु लक्ष्मीचे पुजन,

ताट छान सजवून....

करु आदर ताईचा,

भाऊबीज येता दिन.....||६||

दिवाळीच्या स्वागताला,

उतरती चंद्र तारे....

त्यांच्या दिव्य प्रकाशाने,,

झाले दिप्यमान सारे.....||७||