चांद्रयान मोहीम - 2

शतक कराया पडली केवळ

एकच धाव कमी

म्हणुनी होतो निराश कधी का

जिगरबाज हो आम्ही

आज तोकडे असेल थोडे

पडलेले पाऊल

अभिनंदन चंद्राने केले

हीच यशाची चाहूल

स्वागतास मी भारत देशा

पसरीन माझे बाहू

नव्या दमाने पुन्हा एकदा

यान पाठवा पाहू

टाळून उणीवा झेप घेऊनी

यावे माझ्या घरी

पुष्पवृष्टी मी करीन तेथे

खूप तिरंग्यावरी

हिंदुस्थानी जिद्दीचा तर

मीही एक चाहता

चला करा बिनधास्त तयारी

कसली वाट पाहता

अंतराळही दूमदुमवू या रे

करू निनाद जयघोष

शास्त्रज्ञांनो तुमच्यामध्ये

भरपूर जिद्द नि जोश

नका मानू हे अपयश बिलकुल

कारण ना धक्क्याचे

मानकरी तुम्ही आजमितीला

नव्याण्णव टक्क्यांचे !