भक्तीला पाव

नमो श्री गणेशा / आलो परमेशा  

धरूनिया आशा / दर्शनाची ।।१।।

डोळे तरसले / तुझ्या दर्शनाशी

उभा पायरीशी / दास तुझा।।२।।

पुंडलिका साठी / युगे अठ्ठावीस

उभा राहिलास / वीटेवरी ।।३।।

जनाबाई साठी / शेणही थापले

जातेही ओढले / सखूसाठी ।।४।।

संत चोख्यासंगे / ढोरे ओढीयले

वस्त्र पुरविले / द्रौपदीशी ।।५।।

उभा जगजेठी / पांडवांच्या पाठी

त्रास भक्तांसाठी / साहोनिया ।।६।।

सोडिले सत्वरी / वैकुंठ केशवा

गजेन्द्राचा धावा / ऐकूनिया।।७।।

मनी भोळा भाव / हाक देता धाव

भक्ताला तू पाव / पांडुरंगा ।।८।।

मुखी गोड नाम / हाती तुझे काम

हेच तीर्थ धाम / 'पंडिता'चे ।।९।।