भाऊबीज

भाऊबीजेच्या सणाला

बहिण ओवाळी भाऊराया

बहिण भावाचं पवित्र नातं

एकमेकांवर अपार माया

भाऊबीजेच्या सणाला

औक्षणाचं सजतं ताट

गोडधोड सुग्रास भोजन

रांगोळीनं सजतो पाट

मोठ्या ताईचा लाडोबा

लहानगीचा पाठीराखा

दादागिरी दाखविणारा

बालपणीचा कुटूंबसखा

बापानंतर जबाबदारी 

स्वीकारतो हाच भाऊ

बहिणीसाठी ह्रदय त्याचे

लोण्याहून असते मऊ

जीवापाडं जपते नातं

भावांची लाडाची ताई

बहिणीच्या रुपात लाभते

आईनंतरची एक आई

बहिण भावाचं जपते नातं

आमची हिंदू संस्कृती महान

बहिण ओवाळते भाऊराया

भाऊ देई ओवाळणी छान!!!