बाप

 ओल्या मातीत राबतो

 रक्त आटवितो बाप

 रात्रंदिन करी कष्ट

पुण्यवान माझा बाप //१//

    माया बापाच्या नशिबी

     काळया मातीत राबणं

     राब राबूनं शेतातं

    अन्न धान्यं पिकवनं //२//  

ऊन पावसाची पर्वा

नाही केलीया बापानं

वावरात त्याचा ठिया

करी शेताची राखणं //३//

     बाप पिकवतो पीक

      घाम गाळून शेतात

      तवा पडतात राशी

      माया बापाच्या घरात //४//

काळी कसदार माती

जगवते सगळ्यांना

नाही पडायचं कमी

पोटभर सगळ्यांना //५//

      खरा जगाचा पोशिंदा

      माझा शेतकरी बाप

      माझ्या बापाच्या कष्टाचं

       नाही होत मोजमाप //६//