बाबा मला माफ करा

बाबा माझ्या अभ्यासाला 

तुम्ही अग्रक्रम दिले

अभ्यासाच्या जोडीलाच

कलागुण शिकविले

हात प्रेमळ सदैव

असे माझ्या पाठीवरी

चढे लेक प्रगतीच्या 

पायऱ्याच वरवरी

अभ्यासात मन माझे

परीक्षांचे भय वाटे

शब्द देता आधाराचे

मनातले भय फिटे

माझी परीक्षा संपता

बेत कितीक रचले

आनंदात परतता

अघटित हो घडले

कसा अचानक आला

तीव्र हृदय झटका

केले होत्याचे नव्हते

बसे मनाला चटका

खरे वाटत नव्हते

मजपुढे वाढलेले

बाबा मला माफ करा

दुःखावेगे ओरडले

नाही काही सेवा केली

नाही तुम्हां रिझविले

कल्पवृक्ष कन्येसाठी

लावुनिया बाबा गेले

किती बेत केले होते

तुम्हांलागी सुखवाया

गेले सर्वचि लयासी

बाबा मला माफ करा