असं एक वादळ शमलं

शतकानुशतकाचं मनुवादाचं भूतही

ज्याच्या चरणी नमलं

असं एक वादळ शमलं

असं एक वादळ शमलं ||0||

ज्या मनुवादानं मानवताच

गुलामगिरीत जखडून टाकली

अशा यंत्रणेची पाळमुळंच

भीमरावानं उखडून टाकली

विद्वानांचं तत्वज्ञानही

ज्याच्या विद्वत्तेसमोर नमलं

असं एक वादळ शमलं

असं एक वादळ शमलं ||1||

सूर्यासारखा स्वयंप्रकाशित

तो जन्मभर राहिला

आम्ही तर आमचा बुद्धच

भीमरावात पाहिला

बुद्धाच्या अगाध तत्वज्ञानात

ज्याचं मन रमलं

असं एक वादळ शमलं

असं एक वादळ शमलं ||2||

त्या अफाट विद्वत्तेला उपमा काय द्यावी

हेच समजत नाही

अजूनही त्याच्या ज्ञानाचं

अगाध स्वरूपच उमजत नाही

कोणालाही ज्याचा

पराजय करणं नाही जमलं

असं एक वादळ शमलं

असं एक वादळ शमलं ||3||