आयुष्याच्या वळणावर

ध्येयदिशेने चालत जाते गाडी आयुष्याची

प्रवासात कधी पर्वा नसते ऊन पावसाची

मार्ग चालता सुख दुःखाचे चढ उतारही येती

कशी बदलते दिशा अचानक ठप्प होते गती

बालक्रीडांच्या दवबिंदूंनी सकाळ ओलावते

तारुण्याच्या नशेत सर्रकन् दुपार निघून जाते

कातरवेळी काळजीने मन होते कातर कातर

ओसरते मग जीवन आणि मरणा मधले अंतर

लेखा जोखा आयुष्याचा हिशेब पुढे मांडतो

त्या वळणावर जुन्या स्मृतींचे गाठोडे सोडतो