आठवतो भीम माझा

आठवतो भीम माझा

इतिहास घडवताना

मृत मानवी मनांचा

स्वाभिमान जागवताना ||0||

गर्वाचा अंश नाही

आईची प्रेमळ माया

रणरणत्या वाळवंटी

दलितांना झाला छाया

सम्राटापरी लढण्याची

सवय जडवताना ||1||

द्या बंधने झुगारून

अमानुष दानवतेचे

मनुवादी यंत्रणेला

तडे द्या मानवतेचे

चातुर्वर्णी रचना

पायदळी तुडवताना ||2||

गाळीत आसवे का

जीवन हे विष झाले

भीमाच्या लेखणीला

पुरेसे निमिष झाले

धाय मोकलून

जातीयवाद्यांना रडवताना ||3||

किती धूळ साचलेली

मेंदूवर शोषितांच्या

हातीही काही नव्हते

देवदूत प्रेषितांच्या

ती धूळ लाचारीची

ज्ञानाने उडवताना ||4||

शतकांची ही लाचारी

संपवण्या सिद्ध झाला

उद्धारण्या या देशा

तो वचनबद्ध झाला

मन जखमी अंत्यजांचे

मायेने मढवताना ||5||