आठवणीतील शाळा

सांगा सांगा कुणीतरी 

कधी उघडेल शाळा 

घरी मला बसण्याचा 

आता आलाय कंटाळा.. १ 

पाटी दप्तर घेऊन 

आलो करुन तयारी 

गाडी शाळेला नेईन 

वाट बघतोय दारी.. २

खेळ खेळण्या मैदान 

खुणावतो काळा फळा 

मित्र येतील शाळेत 

रंगे गप्पांचा सोहळा.. ३ 

शाळेतील माझ्या बाई 

हाक प्रेमाने देतील 

पाढे कविता म्हणता 

मला जवळ घेतील.. ४

खोड्या करता थोड्याशा 

रट्टा गुरुजी देतील 

देता उत्तर प्रश्नाचे 

लाड माझे करतील.. ५

आठवूनी सा-या गोष्टी 

वाटे स्वप्नातली शाळा 

कधी बोलेल मायेने 

यावे शाळेमध्ये बाळा... ६ 

शिक्षणाची वाताहत 

 आता तरी हो थांबावी 

आठवणीतील शाळा 

प्रत्यक्षात उतरावी... ७