आली दिवाळी
आली दिवाळी
आली दिवाळी, आली दिवाळी
घेऊन आठवणींची झोळी || धृपद ||
सजणे नटणे तुझ्यासाठी
बघावे एकदा तरी मला
ह्या दिवाळीच्या सणाला
हिच उत्कंठा माझ्या मनाला
आली दिवाळी.........||१||
झलक एक माझी बघण्याला
होई जीवाची घालमेल किती
कळतसे ते माझ्या मनाला
मन जे गुंतले एकमेकांती
आली दिवाळी........||२||
फराळ दिवाळीचा खातांना
सय येई तुझी हमखास
लाडू बेसनाचा न चकली
तुझी आवडती असे खास
आली दिवाळी.....||३||
जरी तू आहेस परदेशी
होऊ नको मनी उदासी
जरी न भेट आपली घडे
मन हे मनास येई भेटेसी
आली दिवाळी .......||४||
गुंतता हृदय हे ,तमा नसे
आस मनाला भेटीची जरी
भेटशील जेव्हा कधी काळी
ती माझी दिवाळी, तीच होळी .....||५||