आले आभाळ भरून

आले आभाळ भरून

दाही दिशा काळोखल्या

पडलेल्या भेगातून

बाई धरणी हासल्या

नभ आनंदून गेला

सरीवरी सरी धाडे

सोबतीने सईनाई

विजबाई कडकड़े

धरतीच्या अंगावरी

ऊन पिवळे पडले

वाटे नव्या नवरीचे

अंग हळद माखले

भेटे तिचा भरतार

कंठ मातीला फुटला

फुटे अत्तराची कुपी

गंध मोकळा सुटला

भुमी ओली चिंब झाली

नव्या भेटीने लाजली

शालु नेसून हिरवा

गोड गुलाबी हासली

पिऊनिया रानवारा

सांड चौखुर उधळे

त्याला बांधून ठेवाया 

दावा कमजोर पडे