आजी आजोबांची भेट

खूप वेळ वाट पाहिलीस

आजी येते आता भेटीस

जप तिला आजोबा प्रेमाने

कफ आहे अजून छातीत

कामाची सवय तिला खूप

संसार काही सुटला नाही

म्हणावं कर थोडा आराम

बस आता शांत एकाजागी नीट

आल्या आल्या आजोबा

तुझ्याशी खूप मारेल गप्पा

अभिमानाने सांगेल तुला

साऱ्या कुटुंबाच्या गाथा

नातसून अन नातजावयाचं

कौतुक खूप ती करेल

नातवंड ही आहेत मजेत

तुला ती भरभरून सांगेल

सुना मुलं तुमची सारी

गुण्यागोविंदाने नांदतात

एकमेकांना ते सगळे

अगदी जीवापाड जपतात

थोडा आराम झाल्यावर

फिरायला तिला घेऊन जा

आता सत्ता तुमची तिथे

पुढील प्रवासा साठी शुभेच्छा