തെന്നൽ

        

പിന്നിട്ട വഴികൾ തിരനോട്ടമായെൻ

മിഴികളിലലയടിച്ചുയർന്ന നേരം

നഷ്ടത്തിനോർമ്മകൾ ഹൃദയത്തിനറകളിൽ 

നെരിപ്പോടായ് നിന്നു നീറിയണഞ്ഞുവോ

   കാലങ്ങൾ കോറി വരച്ചോരോ ചിത്രങ്ങൾ 

   മായാതോർമ്മയിൽ താളം പിടിക്കുമ്പോൾ 

   ദീർഘ നിശ്വാസങ്ങളൊന്നുമേയെന്നുടെ

   ആശ്വാസകുളിർ മഴയായെത്തിയില്ല

ജീവിതവീഴ്ച്ചകൾ പഠിപ്പിച്ച പാഠങ്ങൾ 

വെളിച്ചമായ് കൺമുന്നിൽ തെളിഞ്ഞിടുന്നു

അട്ടഹാസമായെത്തുമാ തോൽവിതൻ ഭീഷണി

ഏതുമേയെന്നരികിൽ ജ്വലിക്കയില്ല

   കാർമേഘകെടുതികൾ കാറ്റിനാൽ മാഞ്ഞപോൽ

    തെളിനീർ മഴകൾ കുളിരായ് മാറിടും

    ദൃഢനിശ്ചയമേകുമകതാരിൽ 

    കരുത്തുറ്റ് മുന്നേറാം ലക്‌ഷ്യത്തിലേക്കായ്