ಪ್ರಾರ್ಥನೆ

ಆಷಾಢದಲ್ಲೊಂದು ದಿನ

ಇದ್ದಕ್ಕಿದ್ದಂತೆ ನೀನು ಬಂದೆ

ಇಳಿ ಸಂಜೆ ಮಳೆಯಂತೆ

ತುಂಬಿ ಹರಿವ ಹೊಳೆ

ಬಳಿ ಸಾರಿ ಬಂದಂತೆ

ತೆವಳುತ್ತಾ ತೆವಳುತ್ತಾ

ಬೇರು, ಜೀವಜಲ ಹುಡುಕುತ್ತಾ

ತೊರೆ ದೂರವಿದ್ದರೂ

ತಂಪು ಹೊತ್ತು

ಬರುವ ತಂಗಾಳಿಯಂತೆ

ಮುಂಜಾನೆಯ ಎಳೆಬಿಸಿಲಿಗೆ

ಮೊಗ್ಗರಳಿ ಲಾಸ್ಯದಲಿ ಅರಳಿದ

ಹೂಗಳ ಪರಿಮಳಿದ ಭಾರಕ್ಕೆ

ಬೀಸುವ ಗಾಳಿಯಲ್ಲಿ

ಸುಗಂಧ ಪಲ್ಲವಿಸಿದಂತೆ

ಹಾಗೇ ತೆರೆದಿಟ್ಟ

ಕಿಟಕಿ, ಬಾಗಿಲು

ಹೇಳಲಿಲ್ಲ, ಕೇಳಲಿಲ್ಲ

ಒಳಗೆ ಇಟ್ಟಾಗಿದೆ ಹೆಜ್ಜೆ

ಇನ್ನೂ ಸ್ವಲ್ಪ ಹೊತ್ತು

ಇರಬಾರದೇ ಹೀಗೆ.....?!