ಚಳಿಗಾಲದ ಬಿಸಿಲು

ಗರಿಗೆದರಿ ನಿಂತ ಭಾವನೆಗಳು

ಪುಟಿದೇಳುತ್ತವೆ ಅಂತರಾಳದಲ್ಲಿ

ಹೊಸ ಕನಸುಗಳ ಕಾಣುತ್ತ

ಸಾಗರದಾಚೆ ಕಂಡ ಬಾನಲ್ಲಿ

ಇಳಿಬಿದ್ದ ಸೂರ್ಯ ನಗುತ್ತಾನೆ

ಮುಂಗಾರಿನ ಮಳೆಹನಿ ಕಂಡು

ಕಾದ ತೊಯ್ದ ಹನಿಗಳ ಸಾಲು

ಎಳೆ ಮರಿಯ ನೋಯಿಸಿದ

ಇಬ್ಬನಿ ತುಂಬಿದ ಹಸಿರು

ಕಂಪಿಸುತ್ತದೆ ಚಳಿಗಾಲದ ಬಿಸಿಲಿಗೆ

ನಗುಮೊಗದ ಚಲುವೆಯ

ನೋಟಗಳ ಸವಿಯಲ್ಲಿ

ಇರುಳು ಸರಿಯುತ್ತದೆ

ತೋಳುಗಳ ಬಳಸುತ್ತಾ

ಕಾಡುವ ನೆನಪುಗಳು

ಗೆಳತಿಯ ಬರುವಿಕೆಗಾಗಿ

ಮಾಗಿ ಸಾಗಿದೆ

ಬತ್ತಲೆ ಕನಸುಗಳ ಮೆಟ್ಟಿ

ಗೋರಿಯ ಮೇಲಿನ ಹಾಡು

ಎದೆ ತಟ್ಟಿ ಬಿಗಿಯುತ್ತಾ

ನೂರೆಂಟು ಬಯಕೆಗಳು

ಎದೆಯಾಳದಲ್ಲಿ ಬಿರಿಯುತ್ತವೆ

ಕಡಲ ಮೇಲಿನ ಗಾಳಿ

ತೋಯಿಸಿದ ಬಟ್ಟೆ ತೆಳುವು

ತರುಣಿಯ ಎದೆಮಟ್ಟ

ಬೆಳೆದು ನಿಂತ ಹೂಬಳ್ಳಿ

ತೋಟದಲ್ಲಿ ಸದಾ ಬೆಳಗು