યાદો વસાવી છે હૃદયમાં

ઘણી યાદો વસાવી છે હૃદયમાં એક શમણાંથી,

વિના સંકોચ એથી તો ફરું છું રોજ જલસાથી.

મિટાવો ભેદ ભીતરના પછી દેખાય એ તમને,

દટાયા છે જુઓ સપના અહીં તો કૈંક અરસાથી.

મને મંઝિલ મળી ના ત્યાં છતાં શ્રદ્ધા ન મેં છોડી,

પછી આંબી સફળતાને જુઓ મેં એ જ રસ્તાથી.

યમુના આજ પૂછે છે ગયું છે કોણ છોડીને?

પડી છે ભાત કિનારે કનૈયાના જ પગલાંથી.

વલોવીએ હૃદય ત્યારે બને છે એક આ રચના,

નથી બનતી ગઝલ 'હેલી' ઉછીના એક મત્લાથી.