યાદ

તું યાદ આવી આવીને કેટલું આવીશ?
મારા હૃદયથી આંખોના આંસુ સુધી?

કે પછી ભીતરમાં રહી ઊર્મિઓને અકળાવી,
નસેનસમાં કંપારી કરી ચાલ્યો જઈશ?

છે ઘણા લોકો જે મને સંભળાવે તારી એ ગઝલ!
રદીફ-કાફિયામાં આમ જ આવતો રહીશ?

તું હોય સામે ને હું હોઉં હવામાં ઓગળતી,
એકાદા તુચ્છ પીંછાથી મને અડતો જઈશ?

છે હવા, મોસમ, પ્રવાહ બધામાં તારું સ્મરણ,
શ્વાસમાં મારા મને આમ જ અથડાતો રહીશ?

હું નથી રહી મારામાં હવે કે કશું કહું તને,
શ્વાસ ઘડી-બેઘડી રોકું તો શું તું ચાલ્યો જઈશ?