તારી આંખમાં

પ્રેમ જો છલકાય તારી આંખમાં,

મર્મથી મલકાય તારી આંખમાં.

શ્વાસ ધબકે છે મજાના પ્રેમમાં,

પ્રેમ પણ શરમાય તારી આંખમાં.

સ્વર્ગની પરવા નથી કરતો કદી,

સ્વર્ગ પણ પરખાય તારી આંખમાં.

મેં સજાવી છે મજાની ઝૂંપડી,

મ્હેલ જીવતો થાય તારી આંખમાં.

જેટલો આ શ્વાસને હું સાચવું,

એટલો અથડાય તારી આંખમાં.

ભૂલવા માંગું તને હું જેટલું,

યાદ આવી જાય તારી આંખમાં.

મેં ખુદાને ક્યાંય પણ દેખ્યો નથી,

તે છતાં વરતાય તારી આંખમાં.