સમયચક્ર

સમય એમ જ ચાલતો રહેશે,

ઘડિયાળ એમ જ દોડતી રહેશે,

કલાક મિનિટના કાંટા એમ જ આગેકૂચ કરતા રહેશે,

દિવસો એમ જ અટક્યા વગર વિતતા જશે,

મહિનાઓ વર્ષો એમ જ એની ગતિએ ઘપતાં રહેશે,

જીવન ફરી એમ જ ધમધમતાં થશે,

દુકાનો, રેસ્ટોરન્ટ, પાર્લર, સિનેમાગૃહ એમ જ ઉભરાતાં થશે,

પ્રસંગો વ્યવહારો એમ જ ફરી નિભાવાતા થશે,

બસ આસપાસ કે ચોપાસ, દૂર કે નજીક, મનમાં કે દિલમાં,

પ્રત્યક્ષ બોલાતાં, જીવાતાં કેટલાંય નામ એમ જ ભૂતકાળ બનીને લેવાતાં થશે,

અચાનક કોઈ પરિવાર આખો એમ જ વિખેરાઈ જશે,

કેટલાય સંબંધો એમ જ બોલાતા બંધ થઈ જશે, 

ઈશ્વરને મંગળા શૃંગારનાં પદને બદલે દયા માંગવાનાં પદ એમ જ ગવાતાં થશે,

અને કળ વળતાં જગત આખું એમ જ ફરી હસતું રમતું પણ થશે.