Library
શૌર્ય
શૌર્ય
પ્રેમ પંથ છે અતિ કઠિન,શૌર્ય દાખવવું પડશે,
ધડકનોને કહો હવે પૂર્ણ ધૈર્ય રાખવું પડશે !
લાગણીનું બીજ ફના તો થઈ ગયું પ્રેમની ધરામાં,
હવે ફૂલ ખીલ્યા પછી ફળ સુધી ધૈર્ય રાખવું પડશે !
પહેલી નજરે પ્રેમ થયો ને એ ગાયબ છે ત્યારથી,
હવે ફરી નજરો મળે ત્યાં સુધી ધૈર્ય રાખવું પડશે !
રણમાં ઊગવાની જીદ લઈને બેસી તો ગયું છે એ,
બસ, ઝાકળ આવે ત્યાં સુધી તો ધૈર્ય રાખવું પડશે !
હિમ થઈને થીજી ગઈ છે, તને પામવાની સ્પૃહા,
સત્યનો સૂરજ ઊગે ત્યાં સુધી ધૈર્ય રાખવું પડશે !
અજ્ઞાનના અંધારામાં અટવાઈ ભલે જાત આપણી,
જ્ઞાન જ્યોત પ્રગટે ત્યાં સુધી તો ધૈર્ય રાખવું પડશે !
જીવન નૌકા ઝોલા ખાતી અટકી છે મઝધારે ત્યારે,
ન આવે કિનારો ત્યાં સુધી તો ધૈર્ય રાખવું પડશે !
તન સૂકવી, કાળજા છેડાવી એના ઈંતજારમાં છું,
હોઠ શ્યામના સ્પર્શે ત્યાં સુધી તો ધૈર્ય રાખવું પડશે !
મૂર્તિ સામે ભલે બેસી રહો મંદિરમાં તમે, પણ-
અમૂર્ત ન ઓળખાય ત્યાં સુધી ધૈર્ય રાખવું પડશે !
'પરમ' શબ્દો પાછળ 'પાગલ' થયો આજીવન ભલે,
નિઃશબ્દ ન પરખાય ત્યાં સુધી ધૈર્ય રાખવું પડશે !
