સચરાચરમાં શ્યામ
સચરાચરમાં શ્યામ
કલૈયા કામણગારા કાનુડાની કેવી અંતર્યામી વાતો !
ઘેલી ઘેલી વાતોમાં છૂપાયાં જીવતરનાં અગાધ રહસ્યો !
જન્મ્યો દેવકીનંદનની કોખે વાસુદેવ-યશોદાનો લાલો,
પ્રેમ કર્યો રાધાને પણ પામવાનો નહિ કોઈ દાવો !
ઘેલું કર્યું ગામ ગોકુળિયું, ગોપગોપીઓનાં સંગે !
માથે મોરપીંછ ધરીને વાંસલડી રૂડી વગાડી તરંગે !
રાધા, વાંસળી, ગામ ગોકુળિયું ત્યાગી ધર્યું સુદર્શન ચક્ર !
સત્યનાં જ પક્ષે રહી કાનજી પાંડવનાં બની ગયાં મિત્ર !
સારથી બની મિત્ર અર્જુનનો રથ હાંક્યો યુદ્ધમોરચે !
જીવન પણ છે યુદ્ધ ! આવ, સારથી બન જીવનરથ પર !
કૃષ્ણ સરખો હોય સખો તો જીવનનો દૂર થઈ જાય ડર !
કૃષ્ણ સરખો હોય સખો તો ભવોભવના ઉતરે ભાર !
કૃષ્ણ સરખો હોય સખો તો ભવાંતરનાં ફેરા ફૉક !
કૃષ્ણ સરખો હોય સખો તો જીવનમાં ના કોઈ શોક !
દ્રૌપદીનાં સખાએ અદ્રશ્ય રહી ભરી સભામાં પૂર્યાં ચીર !
સિદ્ધાંત કર્મનો સમજાવ્યો, સારથી અર્જુનના ગિરધર !
કામણ કેવાં કર્યાં કાનુડાએ, વિશ્વ રટ્યાં કરે હરે કૃષ્ણ !
ભીડ પડે જીવનમાં કોઈ તો યાદ કરે રાધે કૃષ્ણ !
વાયુ સંગ મોકલ સંદેશ શ્યામ, અવતાર ધરી ક્યારે આવીશ ?
અદ્રશ્ય રૂપે કહી દે કાનમાં, ભવ મારો ક્યારે તારીશ ?
હોય હાથ માથે માધવનો તો જીવન બની જાય ધન્ય !
હોય સાથ રાધાનાં સ્વામીનો તો જીવન બની જાય રમ્ય !
તું છે દિલમાં, તું છે મનમાં, તું તો સચરાચરમાં !
અત્ર, તત્ર, સર્વત્ર તું, તું ધરતીનાં કણકણમાં !