પ્રથાને તેં બનાવી છે

ખુદા શું કામ આવી આ પ્રથાને તેં બનાવી છે,

દફન કરવાને આ બે ગજ જગાને તેં બનાવી છે,

બધા તુજથી ડરે એ કારણે લાગે મને એવું,

સદીઓથી જૂની આવી શ્રદ્ધાને તેં બનાવી છે,

દુઆથી કામ ચાલે એમ જો હતું તો પછી શાને ?

ન કામ લાગે એવી બદદુઆને તેં બનાવી છે,

દર્દ ના દેત તો બગડી જતે શું ઓ ખુદા તારું,

પછી પાછી દર્દ માટે દવાને તેં બનાવી છે,

ખુદા એ આ જવાબ આપ્યો મને "સંગત" અતીસુંદર

ફક્ત દુનિયા બનાવી મેં જફાને તેં બનાવી છે.