ફળિયા

સિમેન્ટના જંગલમાં તો સોના કરતા મોંઘા ફળિયા,
ગામડાની કેવી અનેરી શાન હતા અનોખા ફળિયા !

હજી જીવે છે મારૂં બચપણ એ અણમોલ ધૂળમાં,
કેટ કેટલી સોનેરી સ્મૃતિઓ સંઘરીને બેઠાં ફળિયા !

ખુલ્લા ખુલ્લા ને ખમીરવંતી ખાનદાનીના એ સાક્ષી,
બંધ ડેલીમાં દિલ ખોલીને કેવા હસતા ફળિયા !

હાકલા, પડાકા, હોંકારા ને કહૂંબાની ઈ સભાઓ,
શૂરવીરોને કેવું શૂરાતન ચડાવતા ફળિયા !

ને હવે ભાંગ્યા ગામડા ને વિસરાઈ એ સંસ્કૃતિ,
વિકાસ ને પ્રગતિના ખપ્પરમાં હોમાયા ફળિયા !

ઉદાસ સંધ્યાએ ઉતર્યા છે અસ્તાચલનાં ઓળા,
ને પછી મેં જોયા આખી રાત પોકે પોકે રોતા ફળિયા !

એક 'પરમ' વિરાસત વિસરાઈ ગઈ જીવનની,
હવે શહેરમાં સૌ 'પાગલ' થઈને શોધતા ફળિયા !