પડછાયો

મને મારાથી અલગ કરી શકતો નથી આ પડછાયો,

સૂર્યને કે ચંદ્રને ભરી શકતો નથી આ પડછાયો,

આભાસી શ્વેત વસ્ત્રધારી ભટકતી છાયા તો માયાવી છે,

વ્હેતા જળમાં કદી તરી શકતો નથી આ પડછાયો,

કદી નાનો કદી મધ્યમ કદી મોટો મારામાં સમાયો છે,

અસલી છબી થઈને ઠરી શકતો નથી આ પડછાયો,

સાંજ ઢળે સૂર્યમાં ભળે હરદમ એનો સાથ ના મળે,

નિશદિન પાન જેવો ખરી શકતો નથી આ પડછાયો,

વટાવી સીમા આભાસી આકાર જેવો થઈ જાય છે,

સુખદુઃખ સંગાથ વિસ્તરી શકતો નથી આ પડછાયો.