મઢુલી
મઢુલી
દેહની મઢુલીનું હું લીંપીગુંપીને બેઠી છું મારૂં આંગણું,
ઉંમરના ઓવારે ઉઘાડીને બેઠી છું રૂદિયાનું બારણું !
આંખોમાં આંજી એક અગમ્ય ઈંતજાર શબરીના સ્નેહનો,
રાહ જોઉં હું તો પાથરીને ફળિયામાં પ્રેમનું પાથરણું !
એક એક પળ વીતે જાણે એક એક યુગ જેવડી હવે,
અપલક આંખોએ રામ આગમનની હું તો ઘડીઓ ગણું !
રાધા બની રોવ અનરાધાર, મીરા બની મથું વિયોગમાં,
કયા ભવે સાંપડશે મુજ અભાગણને શ્યામનું શરણું !
એ આવે તો આ મૃત મઢુલી થઈ જાય જીવંત રાજમહેલ,
એ જ ભરથાર મારા ને પરણું તો હવે એને જ પરણું !
શું કામના શણગાર હીરા મોતી માણેકના આ મઢુલી ને,
હવે તો તું જ મારો અણમોલ શ્રુંગાર ને તું જ સાચું ઘરેણું !
'પરમ' પ્રેમમાં થઈ ગઈ છે 'પાગલ' આ જાત મારી ભોળી,
ને હવે નક્કી જ નથી થતું કે આ હકીકત છે કે શમણું !