મારી માનસી

મારા આંગણાનું પારેવું આજ કેમ ઉડી ગયું ?

કેમ રે જાણે મારા જીવનમાં આ શું થઈ ગયું ?

તારી નાની પગલીઓ મુજ છાતી પર રમતી,

તારી મિઠુંડી વાતો મારા હૈયા સમીપ ભમતી,

મારા હૈયાના ધબકારને ઓચિંતું શું થઈ ગયું,

મારા આંગણાનું પારેવું આજ કેમ ઉડી ગયું ?

રોજ પહેલું જોઈને મુખલડું થાતી સવાર મારી,

ખુલશે આંખડી હવે તોય જિંદગી આખી ખારી,

મારા વ્હાલના દરિયામાં તોફાન શાને થઈ ગયું,

મારા આંગણાનું પારેવું આજ કેમ ઉડી ગયું ?

પગ પડે પરસાળ ત્યાં બારણે ઉભી દેખું તને,

તારા વીના આ જિંદગી કેવી નઠારી લાગે મને,

મારા હાથથી ગુથેલા આ હારલાને શુ થઈ ગયું,

મારા આંગણાનું પારેવું આજ કેમ ઉડી ગયું ?

તારા કરે દીધેલા કોળિયા કોણ હવે દેશે મને,

ભૂખી પથારીમાં તું સુવે કોણ હવે જોશે તને,

મારા ખોળે પોઢેલી માનસીને આ શું થઈ ગયું,

મારા આંગણાનું પારેવું આજ કેમ ઉડી ગયું ?

મારા આંગણાનું પારેવું આજ કેમ ઉડી ગયું ?

કેમ રે જાણે મારા જીવનમાં આ શું થઈ ગયું ?