માનો શૃંગાર !

આજ કબાટમાંથી કંઈક,

શોધતા શોધતા જડી આવી,

એક નાની શી ડબ્બી !

જેમાં ગુસપુસ કરતી દેખાઈ,

લાલ ચાંદલાઓની ટોળી,

તરત નજરે આવી ગયો,

માનો હસતો ચહેરો !

હૈયું ભરાઈ આવ્યું,

દેખીને એનો લાલ ચાંદલો !

આ તો મારી માનો શૃંગાર,

મારી માનો શૃંગાર !

આજે જ પહેલી વાર,

હવેલીને દરવાજે દેખી,

એક છોડી,જે વેચતી'તી ફૂલોની વેણી,

કંઈ કેટલીયે વાર,

શોધતી'તી આ ચંપાની વેણી !

પણ વર્ષો બાદ દેખાઈ,

આજ મઘમઘતી વેણી !

નજર સામે આવ્યો,

એ વેણી સજેલો અંબોડલો !

ગૂંથાયેલી વાતો આવી ગઈ યાદ,

જોઈને ચંપાની વેણી !

આ તો મારી માનો શૃંગાર,

મારી માનો શૃંગાર !

આજ ચિત્ત ચકડોળે ચઢ્યું,

માની યાદોની યાદમાં,

ઓલી સાચવીને રાખેલી,

એની નાની શી વીંટી !

ક્રુશ થઈ ગયેલી આંગળીમાંથી,

સરી જતી એ વીંટી !

માને ટોકતા વારંવાર,

સાચવવાને એ વીંટી,

હા ! એ વીંટીમાં વીટી છે,

કંઈ કેટલીયે વાતો !

આજ ફરી નજરે ચડ્યા,

એ શૃંગાર ને યાદો,

આ તો મારી માનાં શૃંગાર,

મારી માનાં શૃંગાર !