કયારે મળીશું ?

પ્યાસ પૂછે થઈ અધીરી એ જ કે ક્યારે મળીશું ?

અશ્રુ ખૂટે થઈ ઉધારી એ જ કે ક્યારે મળીશું ?

યાદ સૌ ટોળે વળીને રાહ જોતી દ્વાર સામે,

ભાવ કહેતું લે ઉગારી એ જ કે ક્યારે મળીશું ?

શાંત ઉરમાં સર્વ કોલાહલ કરે છે લાગણીઓ,

સંગ ચાહત તો વધારી, એ જ કે ક્યારે મળીશું ?

આશ બાંધી છે વચન પર આવવાનું જે કહી ગયાં, 

રોજ સાંધીને મઠારી, એ જ કે ક્યારે મળીશું ?

રામ તું, ભગવાન તું, સ્વામી થઈ દિલમાં વસ્યો જે,

બાંહ ફેલાવી વિચારી, એ જ કે ક્યારે મળીશું ?

પાંપણો પર અશ્રુઓને સૂકવીને કોસતું મન,

વેદના રડતી બિચારી, એ જ કે ક્યારે મળીશું ?

માફ કરશો હોય જો અપરાધ મારા, પ્રેમ માની,

સાદ પાડે એક બારી, એ જ કે ક્યારે મળીશું ?