ક્યાં મળે છે ?

દિવાલોની પાછળ ઘર ક્યાં મળે છે ?

સંબંધોય ઉષ્માસભર કયાં મળે છે ?

ઉતાવળના અંજામ જોયા છે કાયમ,

ઘટે છે ખરેખર સબર ક્યાં મળે છે ?

કહેવાય છે કે નહિં 'માં' ય પીરસે,

કશું ક્યાંય માંગ્યા વગર ક્યાં મળે છે ?

અનુભવ દિવસના વિચારે ચડાવે,

કે નિંદ્રા તને રાતભર ક્યાં મળે છે ?

છે અંદરથી બળવાની તાસીર તારી,

જે સળગે છે એને કબર કયાં મળે છે ?

તેં રાખ્યા છે ખબરી ઘણાં તોય જોને,

તને ‘સ્તબ્ધ’ તારી ખબર ક્યાં મળે છે ?