કવિતા પલળે

વીજળી ચમકે ગગડાટ થયો,

વરસાદ થયો વરસાદ થયો...

ન અષાઢ ન ભાદરવો ન થયો, 

પણ શ્રાવણનો વરસાદ થયો,

વરસાદ થયો વરસાદ થયો...વરસાદ..

પશુ પંખી ય માનવ મોજ કરે,

મન મોર બની થનગાટ કરે,

ચહુકોર અહો...કલશોર થયો..વરસાદ..

નળિયા પરથી જલ બુંદ પડે,

હરિ હેત તણો પરસાદ પડે,

ગરમી જ તણો ઉકળાટ ગયો..વરસાદ..

જલ દેવ કહો વરસાદ કહો,

નત મસ્તકથી તુજ વંંદન હો,

ગગડાટ થયો ચમકાર થયો..વરસાદ..

લખ "મારુતિ" તોટક છંદ મહીં,

કવિતા પલળે વરસાદ  મહીં,

વીજળી ચમકે ગગડાટ થયો..વરસાદ.