કોણ માનશે

અભિનય, ઊંચા ગજાનો હતો, કોણ માનશે ?

પરિચય, મને બધાનો હતો, કોણ માનશે ?

વિશ્વાસથી જ તારા ચલાવું મુજ નાવ ને,

આ વિષય, બહુ શ્રદ્ધાનો હતો, કોણ માનશે ?

સુખને તમે જ રાખો અને દુઃખ મને મળે,

નિર્ણય, કેવો મજાનો હતો, કોણ માનશે ?

આ લોક ના મતે લાંબુ જીવી ગયા અમે,

પણ વધુ સમય, સજાનો હતો, કોણ માનશે ?

સાબિત હવે અમે કશું પણ ના કરી શક્યા,  

મુજ પ્રણય, ધારણાનો હતો, કોણ માનશે ?

તું રુઠીશ એય જો ડર હવે નીકળી ગયો,

ક્યાં ભય હવે કશાનો હતો, કોણ માનશે ?

એણે દુઃખ વધુ પડતા જ આપ્યા હતા મને,

અતિશય, નિકટ ખુદાનો હતો, કોણ માનશે ?

દિલ તોડવા છતાં કશું "સંગત" મળ્યું નહીં, 

આ હૃદયમાં ખજાનો હતો કોણ માનશે ?