કોઈ શું કરે

આખો'દિ એકલો ફર, તો કોઈ શું કરે !

આવો બને તું ડઠ્ઠર, તો કોઈ શું કરે !

મંચ પર તું ય કાલ ચર્ચાનો વિષય હતો,

આવે નવા ધુરંધર, તો કોઈ શું કરે !  

રાખ્યા હતા સુરાગ તમે શોખથી ઘરે,

આવી ભરાય અજગર, તો કોઈ શું કરે !  

છેલ્લી ઘડી, તને નજરો શોધતી રહી,

તું હોય ગેરહાજર, તો કોઈ શું કરે !   

વર્ષો પછી મળ્યા, અમને ઓળખી ગયા,

જાણીતું થાઈ સ્વેટર, તો કોઈ શું કરે !  

સૌને મળ્યું હતું વિષ ખૈરાતમાં સરખું,

બનવા તું જાઈ શંકર, તો કોઈ શું કરે !  

હારી ગયા અર્જુન બધા, હો કુશળ ઘણા,

આવે ન મૂરલીધર, તો કોઈ શું કરે !   

આકાશ ને ધરા મળશે એક દિવસે,

આવા વહેમ તું કર, તો કોઈ શું કરે !