કન્યા વિદાય

ઝાકળની બૂંદ જેવો,

બેટીનો આ કેવો સંગ છે

‘પારકા ધન’ને પરત કરવાનો,

આ કેવો પ્રસંગ છે.

ગમ અને ખુશી હોય એક સાથે,

આ કેવો રંગારંગ છે,

આંસુઓને પણ હસતા રાખવાનો,

આ કેવો જંગ છે.

પપાને રડવાને ઓશીકું,

મમીની આંખોમા સરગમ હશે

બહારથી બેફિકરા દેખાતા ભાઇ-બહેનની,

આંખો, અંદરથી નમ હશે.

દાદા-દાદી અને નાના-નાનીની,

જિંદગીનો આ અજબ ક્રમ હશે,

જીવંત લાગતા ફળિયાને,

સૂનું થઇ જવાનો ગમ હશે.

સંસારમા બેટીની માયા જેવી,

નથી અન્ય કોઇ પણ માયા,

કન્યા વિદાય એટલે,

મા-બાપથી દુર થતા પોતાનાજ પડછાયા.

બેટીની યાદમાં,

અમે તો ભલે રહીશું રઘવાયા

પ્રભુ તારો આભાર કે,

બેટીને સાસરા આપ્યા સવાયા.