ગીત વરસાદી

ઊઠી આવ્યાં જુઓ ઝીણી વાંછટના લીલેરા સોળ;

ષોડસી કન્યા નાહી આજ પ્રથમ વર્ષામાં માથાબોળ,

આળસ મરડીને કન્યા એ કર્યો પીયુને ભીનો સાદ;

ને પછી મન મૂકીને વરસ્યો ભીનપવર્ણો વરસાદ,

શરમની મારી એ થઈ ગઈ પાણી પાણી ને રાતીચોળ;

ષોડસી કન્યા નાહી આજ પ્રથમ વર્ષામાં માથાબોળ.

ભેજલ રાત્રીના મેઘલ અંધકારે ઉજમાતી આ ભીંત;

રગરગમાં રણઝણે મેઘ મલ્હારના માદક આ ગીત.

છમછમ કરતી છમ્મક છલ્લોએ ઉછાળી છમ્મક છોળ;

ષોડસી કન્યા નાહી આજ પ્રથમ વર્ષામાં માથાબોળ.