ઘણી ખમ્મા

ખતા વિના સજા દો એ શરાફતને ઘણી ખમ્મા,

ગુનો જગમાં ગણાઈ એ મહોબતને ઘણી ખમ્મા,

બે આંખે દરિયો સાચવતી નજાકતને ઘણી ખમ્મા,

એ જળને મોતી કહેવાની હિમાયતને ઘણી ખમ્મા,

બની સુરદાસ એ કાયમ જગતને ન્યાય આપે છે,

અસત સત તોલતી રહેતી અદાલતને ઘણી ખમ્મા,

હવાની સાથે ગુંગળામણ, ખુદાની દેન છે કેવી ?

રુંધી શ્વાસો, જીવન દેતી ઈબાદતને ઘણી ખમ્મા !

મળી પીડા સહ્યાની પાત્રતા માના ઉદરમાંથી,

સહનશીલતાની અણમોલી વિરાસતને ઘણી ખમ્મા,

નર્યો ભેંકાર સર્જાશે આ પરસાળે એ જાણે તોય,

પિતાની "સાસરે જા"ની હિદાયતને ઘણી ખમ્મા,

લૂંટાયું તન, પિંખાયું મન, પછી શું બોલવું બાકી ? 

પીડિતાની અકળ મૂંગી શિકાયતને ઘણી ખમ્મા,

નથી ખંજર, નથી ચાકુ, નથી હથિયાર કોઈપણ,

છતાં હૈયાને ભોંકે એ અદાવતને ઘણી ખમ્મા,

ઉદાસી, આહ, આંસુ ને પછી એકધારી એકલતા,

હૃદયના ખૂણે સચવાતી રિયાસતને ઘણી ખમ્મા,

હતું ખંડેર સમ જીવન, તમે આવી સજાવ્યું છે,

હકીબે આદરી, દિલની મરામતને ઘણી ખમ્મા.