દિલદાર મળતા કયાં જગતમાં ?

દિલ વિના લાખો મળે, દિલદાર મળતાં ક્યાં જગતમાં ?

સ્નેહ વરસાવી હૃદય વસનાર મળતાં ક્યાં જગતમાં ?

પ્રેમની રંગત પડે ઝાંખી, છળે છલના થકી સૌ,

લાગણી ઉર સંઘરી કળનાર મળતાં ક્યાં જગતમાં ?

સાધવા નિજ સ્વાર્થ અંગત સાવ થઇ ફરતા રહે છે,

સાંપડે સિદ્ધિ પછી, પળવાર મળતાં ક્યાં જગતમાં ?

જ્યાં ભરોસો સોળ આની હોય એ પણ પીર દેતાં,

શ્વાસનું ચાર્જર બની, ફરનાર મળતાં ક્યાં જગતમાં ?

યાદ એવી સળવળે કે 'શ્રી' થતી બેચેન કાયમ,

વાયદા ઠાલા ધરી છળનાર મળતાં ક્યાં જગતમાં ?