છું હું

નથી એકડો તોય ઘૂંટાયેલ છું હું!

સતત, શૂન્ય માંહે છૂપાયેલ છું હું?

હશે કોઈ ઉછાળી રમે દાવ-પેચ

પછી, હાથ વચ્ચે દબાયેલ છું હું,

કોઈની છું પાટને કોઈની ચીલ થઈ ગઈ

તો ક્યાંક અદ્ધવચ્ચે જ ફસાયેલ છું હું!

ક્યાંક ચઢું મૂરત પર ક્યાંક પેટીનું દાન થઉં,

પછી, કેદ માંહે જ પૂરાયેલ છું હું,

રહું શૂન્ય સાથે છતાં એકલો છું,

કોને જઈ કહું કે ઘવાયેલ છું હું?

રડે કોઈ મુજ પર, હસે કોઈ મુજ પર,

કેવી સાધુતા એ સધાયેલ છું હું!

ના પૂછો હું શું છું? ના હોવ તોય હું છું,

ભલે, રહ્યો સિક્કો સદા કાળથી ને,

તોય હર નોટ માંહે સ્થપાયેલ છું હું.