બધા ઈશ્વર નથી હોતા

ભલા જે હોય છે દિલના, બધા સુંદર નથી હોતા,

નમાવે એ ભલે માથું, બધા આદર નથી હોતા,

મરે છે હરઘડી, મજબૂર એ લોકો હશે કેવા ?

નહીં તો રોજ મરવાના, બધા અવસર નથી હોતા,

વિચારો કેટલો બોજ એ વહે છે એમના જ શિરે,

ઘણા દેખાય છે એવા, બધા પગભર નથી હોતા,

ખુશનસીબી છે એ થોડાકની કે એ બને ભગવાન,

નસીબે એટલા બળિયા, બધા પથ્થર નથી હોતા,

ખુદા બનવું છે સઘળા ને જગતના ઝેર પી લઈને,

છતાં જે ઝેર પીવે એ બધા, શંકર નથી હોતા,

દુઆઓ ના કરો ત્યાં હાથ ફેલાવી તમે "સંગત"

અહીં આ તીર્થસ્થાનો માં, બધા ઈશ્વર નથી હોતા.